بارض جبل لبنان

تحقق حلم هنديي وجات عا لبنان

الحلم كان حلو بس الوجع كتير

عانت حني من المرض بكسروان

وكانت مستسلمي لمشيئة الله القدير

هلمي يا عروسي معي من لبنان

بها الروح هنديي كانت فيها احلام

وسمعت هماس الروح بهاك الزمان

تأكدت هودي حقيقة مش بس كلام

ومش هيك بيحكي نشيد الانشاد

وحط حنين بقلبا  لارض الاجداد

هونيك مطرح ما بيبقى التلج

وهونيك بين الارز ارض المعاد

كل الموارني للجبل في عندن حنين

مطرح ما بيرتفع بلبنان جبل صنين

وهونيك الفنيق الو بالارز مواعيد

مطرح ما من الرماد بيرجع جنين

هونيك مطرح ما بزهر الرمان

مطرح ما بيزهر بكترا الاقحوان

وبالمروج الخضرا بينبت الشقيق

توب احمر قاتم متل الارجوان

من بعد هنديي حكي الملهم جبران

عن مرا اثمي لي اجت من بان

وكيف صدقت الديب ولحقتو عا الوكر

وطلعوا عليها صيت عاطل كمان

يمكن بين التنين في وحدة حال

الاولي استولى عا فكرا مرشدين

والتانيي بريئة متل التلج بالجبال

تنينن ضحيات طموحات الاخرين

هونيك مطرح ما كانت تحن تعيش مع الحبيب

بارض طاهرا نغرس فيها الارز والسندايان

وهونيك العروس بدا تلتقا بهاك الخطيب

وتعيش الحب والاتحاد بارض لبنان

هنديي , سمرا حلبيي متل العروس

نشيد الاناشيد لقال عنا الكتاب

هونيك بتشرب الخمر باغلى كؤوس

بنشوة الافراح بيتبادلوا الانخاب

هونيك ناطرني طلل ورا الغيوم

مطرح ما البخور بيطلع من الوديان

  مطرح ما بحضورو بتختفي الهموم

مطرح ما بالصلا برتفع فوق الزمان

هونيك مطرح ما بالليل بينعدوا النجوم

والقمرا بيسطع بعز التلج بكانون

وبالصيف بيصير ناطور للكروم

تنعصر خمر المحبي فوق القانون

هونيك بيختفي الشر وكل الظنون

ومحبة قلب يسوع جامحة وجنون

ما هم بين البلان والحجار والصخور
ما في علينا رقيب ولا في ظنون

هونيك بسمع نغمة المزمار مع الرعيان

مافي جنود ولا وجاريين وراهن فرسان

هونيك بعيش حرا بتنقل متل كل الطيور

وبصلي بقلب الدير بالفرح وبامان

كان الصوت عا طول كانت تسمعو

وبتقول كمان بحلب عاطول بتقشعو

وحلمها كان تجي عا جبال لبنان
وهونيك بتصير اكتر تعشقو

مش هيك بتقول كل ها الاناشيد؟

يلي بتحكي عن الارز والجمال

وهونيك عاطول ما بنقطع العيد

وبيصير الاتحاد وكل الكمال

ما شافتوا بحلب راكب عا حصان

بقفز عا التلال ويطفر بين الجبال

وهونيك برعايتو ها الجبل صان

تا تلتقي  بلبنان مع هاك الخيال